Nomcebo-Ngibhekephi

Ngibhekephi?

Lomhlaba uyahlaba
Lomhlaba uyakhatsata
Lomhlaba uyangehlula
Lomhlaba uyangesindza
Ngibhekephi?

Lisiko litsi kute intsandzane
Kute nengedzama.
Kepha kimi akunjalo
Lomhlaba ungihlamukile.

Babe angimati
Ngete ngamfanisa ngisho nekumfanisa
Make waphekeletela bokhokho,
Bese avele akhokhobele ke noko,
Ngasala ngiyinhlwa
Inhlwa lengenatimphiko,
kulomhlaba lose ungijikele,
Mhlawumbe kube besikujikamajika, nami ngabe ngijikile.... kepha ke cha!!!
Ngibhekephi?

YEHHENI!!
Ngingumntfwanyana nje
Nengcondvo iseyemtfwana
Netento tisetekuntfwanata
Konkhe kubuntfwana
Ngeke ngikhone kumelana nalomhlaba wetimanga
Ngisho timangamanga mine,
Ungetulu kwemandla
Lulwimi lwawo angilucondzi,
Ngibhekephi pho?

Sekute nje nalongangiva
Lokungenani sale mane angigola,
Mane angibeke ematsefeni lajulile
Lapho ngingafike nami ngetsabe
Mhlawumbe naletimphiko betingahluma,
Nami ngisahlumelela umehluko
Ngoba nyalo angati kutsi ngibhekephi!!
©Nomcebo 2015