Rape Poem by Nomcebo Khumalo

Ngamemeta, Ngakhala, Ngacandvula
Ngate Ngaphelelwa ngemandla.
Ngalwa ngadlubulundzela ngachwishita,
Ngagcina ngibancenga nekubancenga
Kepha bakhetsa kungangiva.
Ngikinatelwe tandlakati taboGoliyadi,
Batse hlizi! etulu bansindza njengemadvwala ekwali,
Ngemandla nangenkhani ngangcunulwa,
Baphisela ngemigcala, bemba bahhobhota,
Ligugu lemfihlako, lelingazange selitsintfwe sandla semfokati.

Bangena baphuma.
Baphula emahlahla esibaya sababe
Bafohlo, umyango bawubona kutsi muncane
Sinyatselo nesinyatsela ngeva ematsambo afohloko
Tinyama tifinyela
Imisipha idzabuka,
Emalunga achuma, enyela.
Yachitseka ingati,
Yagombota ngemphophomo,
Yakha sitiba sentondvo yemlisa.

Batsatsisana ematfuba,
Kusemdlalweni kuyadlawa,
kudlalwa ngebomi bami,
Butfombi bami,
Ligugu lami,
Leligugu belikadze kuligcabho lami.
Kudlalwa ngebuntfu bami,
Lobu bebukadze buphelelisa bungimi bami,
Kudlawa ngeligugu lami.
Leli lebengitsi nangihamba ngibeka,
Lunyawo emva kwelunyawo,
Ngibeve boZikodze bacotfota emsamo,
Batishaye baticedze,
Basho ngenhlitiyo labanemehlo,
Batsi uyatsaba uLaNkhosi.
Kepha ngalelo langa letehlakalo,
Lelo langa ngigiliswa imikhuba,
Phansi kwemazulu, Lomdzala abukile,
Ngakubona konkhe kumbonywa lifu lesangcotfo,
Konkhe kushabalala, kusitsela ebumnyameni.

Bayihamba lendlela boFeleba,
Emahora agabanca,
Bemba ngetinhlindzi temapiki netimbo,
Buhlungu bugadla kume kujula,
Ngumtfwana wemfati njalo nje lo!
Lona lowentiwa umfati sikhatsi sisenombonombo.
Yajika inyama yatsamba, yavutfwa
Umtimba waba dzimudzimu,
Kwalala insidze,
Emehlo agcina asindwa tinkhophe,
Konkhe lokusedvute kwaba titfunti.
Ingcondvo yazula,
Umcondvo wanyamalala.
Wabuya, ngatikhandza ngidzakateke echibini.
Lichibi lengati,
Lichibi lebumnyama,
Lichibi lemaphumo nemphilo lelahlekile.
Lichibi letinyembeti letigelete tangesulwa ngumuntfu.
Ngazama kucacabuka,
Kepha lukhalo lwangesindza,
Tigameko netigigiba tangemuva,
Tadlala bayisikobho.

Sililo sacalela phansi ngisikhihla,
Sate saphetfwa sibibitfwane.
Namuhla ngititfuma ngitikhulule ngeliphayiphayi,
Kutsi ngake ngakhona kutihambela kuyinsimu,
Insimu lecocwa kugelete emabhudlo etinyembeti,
Lusizi luhalalisele ngetigubhu.
Ingani naboMenti batinhloko emakhaya abo
Tivumelwano ejele takhiwa bakhululwa.
Kepha bese kutsiwa umtsetfo wekuvikela bantfu!

© Nomcebo

Nomcebo Khumalo
# PTCA